Halin Nobyembre 7, 2023 tubtob subong, Enero 8, 2024, halos apat na ka beses nga ginapangsaka sang pasistang 62nd IB ang mga panimalay sang mga mangunguma sa Sityo Mandayao-4, Barangay Kamandag, La Castellana, Negros Occidental. Masami ginapangita sang nasambit nga militar ang mga lider kag opisyal sang MAFAWA (Mandayao Farmers and Workers Association). Pilit nga ginapatawag sang mga soldado ang mga membro paisa-isa kag ginapasibangdan nga mga supporter sang NPA. Nagtuga ini sang kakugmat sa mga katapuan sang nasambit nga asosasyon.
Kagahapon, Enero 7, may duha ka mga talalupangdon nga mga tawo ang nagsaka sa balay ni Baking Demerin sang nasambit nga lugar kag nagpakilala nga mga kapulisan. Nagdala sang mga litrato kag pilit nila nga ginapa-ako nga kilala sang tagbalay ang mga laragway sang tawo sa cellphone.
Subong nga adlaw, 15 ka tropa sang pasistang 62nd IB nga nagalambiyong sa publiko nga plaza sang Sityo Mandayao-4. Nagapanaka-saka sila sa mga puluy-an sang mga mangunguma. Samtang, 22 man ka tropa sang nasambit nga militar ang naga-operasyon sa mga sityo sang Mandayao-2 kag Mandayao-3 sang Barangay Mansalanao, La Castellana. May tropa man sang berdugong militar sa Sityo Texas, Barangay Kamandag sang amo gihapon nga banwa.
Alas 12:30 sang hapon kaganiha, may mga report kaangot sa mga mangunguma nga ginkastigo sang 24 ka tropa sang pasistang 62nd IB sa Sityo Mandayao-4, Barangay Kamandag. Nakugmat ang mga pumuluyo labi na ang mga menor de edad nga mga kabataan. Nagapangayo sila sang bulig subong.
