Umani ng mga mayor na pagkilala ang mga pelikulang “Alipato at Muog” ni JL Burgos at “Tumandok” nina Richard Salvadico and Kat Sumagaysay sa 48th Gawad Urian na ginanap sa De La Salle University-Manila nitong Okt. 11.
Parehong kalahok ang dalawang mapangahas na pelikula sa Cinemalaya Philippine Independent Film Festival noong nakaraang taon na nag-uwi rin ng mga parangal kabilang ang Best Picture para sa “Tumandok” at Special Jury Prize para sa “Alipato at Muog”.
Iginawad sa dokumentaryo tungkol sa paghahanap sa dinukot na kaanak na “Alipato at Muog” ang mga karangalang Best Picture, Best Documentary at Best Editing, habang nanalo ang docu-fiction tungkol sa buhay, kultura at pakikibaka ng mga katutubong Ati na “Tumandok” ng Best Direction, Best Supporting Actor para kay Felipe Ganacial, Best Cinematography at Best Music.
Ayon sa mga direktor ng dalawang pelikula, malaking karangalan ang mga pagkilalang natanggap mula sa Manunuri ng Pelikulang Pilipino dahil may personal kahalagahan sa kanila ang kani-kanilang obra.
Ginawaran din ng Natatanging Gawad Urian (Lifetime Achievement Award) ang beteranong aktor na si Dante Rivero para sa kanyang ambag sa pelikulang Pilipino sa kanyang higit anim na dekadang karera. Aktibo pa rin si Rivero at mapapanood sa seryeng “Batang Quiapo” na pinagbibidahan ni Coco Martin.
Pinarangalan din ng Urian sina Dennis Trillo sa “Green Bones” bilang Best Actor, Arisa Nakano sa “Kono Basho” bilang Best Actress, Kakki Teodoro sa “Isang Himala” bilang Best Supporting Actress. Emosyonal namang tinanggap ng anak ni Felipe Ganancial na si Cathy Ganancial ang parangal na Best Supporting Actor para sa amang yumao nitong Mayo.
Kinilala rin sa Gawad Urian ang mga pelikulang “Kono Basho” bilang Best Cinematography, “Green Bones” bilang Best Production Design, “The Hearing” bilang Best Sound at “Bisan Abo, Wala Bilin” bilang Best Short Film.
