Para sa tungkulin at katotohanan – Pinoy Weekly

May 8, 2023


Nitong Mayo 3, ginunita ng mga mamamahayag at tagapagtaguyod ng kalayaaan sa pamamahayag at pagpapahayag ang ika-30 taon ng World Press Freedom Day at sumumpa na hindi ititigil ang laban sa malawakang disimpormasyon at pambabaluktot sa katotohanan ng mga nasa poder.

Sa panahon ng internet at social media, napakabilis na ng pagpapalaganap ng impormasyon at mabilis din ang pagkalat ng maling impormasyon at kasinungalingan na nanliligaw sa atensiyon ng mamamayan.

Simula’t sapul, tungkulin na ng midya at mga mamamahayag ang magbigay ng tumpak at eksaktong balita’t impormasyon sa publiko upang maging gabay sa wastong pagdedesisyon ng mamamayan sa pagpili ng naaayong hakbang sa pagtugon sa mga panlipunang kalagayan.

Ang kalayaan sa pamamahayag, pagpapahayag at akses sa impormasyon, bagaman ginagarintiyang mga karapatan sa buong daigdig, ay patuloy na inaatake at sinisiil ng mga reaksyunaryong estado, tiranikong lider at pasistang puwersang nais linlangin ang mga mamamayan upang makapaghari nang walang kakaharaping pananagutan sa kanilang pagmamalabis at pang-aabuso sa kapangyarihan.

Sa Pilipinas, hinuhuli, kinukulong at pinapaslang ang mga mamamahayag dahil sa kanilang matapang na pagbabalita sa korupsiyon sa pamahalaan, pagpapahirap sa mamamayan, at sa armadong paglaban sa kanayunan.

Nariyan ang patuloy na banta sa buhay, kalayaan at seguridad ng mga mamamahayag, sa dominante, alternatibo o community press man.

Pinipigilan ng pamahalaan ang midya sa pagbabalita nito. Kasama na rito ang hindi pagbibigay ng prangkisa sa ABS-CBN at pag-block sa mga website ng alternatibong midya kagaya ng Pinoy Weekly at Bulatlat.

Patuloy din ang panawagan sa pagpapalaya sa mga mamamahayag na ikunulong tulad ni Frenchi Mae Cumpio ng Eastern Vista, at ng katarungan para sa mga pinaslang tulad ni Percy Lapid.

Hindi rin natin malilimutan ang pinakamadugong insidente ng pagpaslang sa 32 alagad ng midya noong 2009 sa Ampatuan, Maguindanao na naglagay sa Pilipinas sa listahan ng isa sa mga bansang pinakadelikado para sa mga mamamahayag.

Sa ganitong kalagayan, nararapat lamang na lumaban ang mga alagad ng midya, kasama ng mamamayan, para igiit ang mga karapatan at kalayaang pilit ipinagkakait ng estado at mga ahente nito.

Hindi nais ng mga nasa poder na mamulat at lumaban ang mamamayan kaya’t gagawin nila ang lahat para pigilan ang midya sa pagtupad sa tungkulin nito. Ngunit hindi tayo padadaig.

Avatar

Pinoy Weekly

This is a product of collaboration between writers, photographers and/or artists of Pinoy Weekly.



Source link

Pinoy Weekly

Ang Pinoy Weekly ay pahayagang online at print na naglalathala ng mga istorya, imahe at opinyon ng mardyinalisadong mga sektor ng lipunan, kabilang ang mga manggagawa, magsasaka, kabataan, kababaihan, migrante at iba pa. Maliban sa paglalathala sa internet, naglalabas ang Pinoy Weekly ng lingguhang magasin, gayundin ang Pinoy Weekly Special Issues.

Don't Miss

Palestinian Death Toll From Israeli Airstrikes Reaches 25

In the early hours of Thursday, Israel continued to indiscriminately

ALAB Alternatibong Balita | Oktubre 27, 2023

Narito ang mga balita’t pananaw ngayong linggo mula sa Altermidya