Peke kag drama lang ang ginahambal ni 94th IB Commanding Officer Lt. Col. Van Donald Almonte nga may natabo nga engkwentro sa tunga sang nasambit nga militar kag sa Mount Cansermon Command-New People’s Army (MCC-NPA) sa Sityo Pisok, Barangay Buenavista, Himamaylan City, Negros Occidental sang nagligad adlaw, Nobyembre 8, pasado alas 9:00 sang aga.
Gindakop kag pilit nga gindala sang masobra 80 ka mga katapo sang 94th IB ang duha ka sibilyan nga sila Joel Casusa, 40 kapin anyos kag Jenny Radles, 50 kapin anyos, pareho nga mga mangunguma nga naga-estar sa amo nga sityo. Ginkuha sila sa ila balay sang kaagahon kag gindala sa higad suba kag didto gin-interogar, ginpahug kag gintortyur.
Halin pasado alas 8:00 sang aga nagpinalupok sang masobra isa ka oras ang mga elemento sang 94th IB sa suba (boundary sang Sityo Pisok kag Sityo Cantupa) kag ginpagwa nga kuno naka-engkwentro sila sa mga katapo sang NPA. Indi man matuod nga nakakumpiska ang militar sang mga lagba nga armas kag mga bala, kag iban pa nga kagamitan militar.
Si Casusa anay Chairman sang lokal nga asosasyon sang mga mangunguma nga Kauswagan sang mga Mangunguma sa Barangay Buenavista (KMB) samtang aktibo man nga katapo sa amo nga asosasyon si Radles. Ikaduha ka beses na ini nga gindakop si Casusa sa pareho gihapon nga rason nga ginapasibangdan nga katapo sang NPA kag ginpasakaan sang pato-pato nga mga kaso. Tuig 2019 sang una siya nga gindakop samtang nagapaligo sa ila bubon kag ginpriso ini sang masobra anum ka bulan matapos na-dismiss ang iya kaso bangud sa kakulang sang ebidensya.
Sang una pa nga natukod ang KMB, malawig na nga nagaatubang ang tanan nga myembro sang pagpangharas, pagpamahug kag pagpangtortyur panahon nga naga-operasyon ukon nagapatigayon sang Retooled Community Support program (RCSP) ang militar sa mga nabukid nga bahin sang Barangay Buenavista.
Halin Nobyembre 5 tubtob subong, padayon gihapon nga nagapanghalit ang naga-operasyon nga tropa sang 94th IB sa mga sityo sang Paloypoy, Owakan, Cantupa, Pisok kag Bulasot, tanan sakop sang Barangay Buenavista. Indi magnubo sa 150 ka tropa ang nakapakat sa subong sa amo nga mga erya.
Lubos nga ginkundenar sang Mt. Cansermon Command-New People’s Army ang pagdakop sa duha ka sibilyan kag pagpresentar sa ila nga mga katapo sang NPA. Kadungan sa paglala sang sosyo-ekonomiko nga krisis nga ginaatubang kag ginaantus sang malapad nga pumuluyong mangunguma, mas ginapalala kag nangin peligro ang ila kabuhi sa atubang sang nagasingki kag lapnagon, sustenido kag nakapokus nga mga operasyon militar sa kabukiran.
Ang mga kalakasan, brutalidad kag wala untat nga mga pagpanglapas sa tawhanon nga kinamatarung nga ginhimo sang militar amo ang dugang nagahalit kag nagaguba sa pangabuhi sang pumuluyo. Amo man ini ang mangin tunaan sang mas mataas nga porma sang pagbatok para mapangapinan ang ila pangabuhian—ang makigbahin sa armadong paghimakas.###
