Nanawagan ng hustisya ang mga kaanak ng magsasakang si Zaldy Cañaveral, 40, na binaril at pinatay ng mga sundalo ng 9th ID noong Mayo 24. Si Cañaveral ay nasa kanyang maisan sa Barangay Busac, Ligao City, Albay nang barilin siya ng mga sundalo.
Para pagtakpan ang karumal-dumal na krimen, pinalalabas ng mga sundalo na mandirigma ng Bagong Hukbong Bayan (BHB) si Cañaveral. Ayon sa ulat, binihisan pa ng uniporme ng sundalo at nilagyan ng isang M16 ang kanyang bangkay para palabasing napaslang siya sa isang engkwentro.
Pinasubalian ni Ka Florante Orobia, tagapagsalita ng BHB-Albay, ang sinasabi ng militar na nagkaroon ng engkwentro sa lugar. Aniya, walang yunit ng BHB sa lugar nang maganap ang kanilang ‘palabas’.
Nagtamo ng isang tama ng bala sa ulo at dalawa sa katawan ang biktima. Labis ang hinagpis ng mga kaanak ni Cañaveral sa kanyang pagkamatay. “Lalabas kaya iyong katotohanan dito o kakalimutan nang lahat…rest in peace na lang sa ninong ko,” post sa social media ng inaanak ng biktima.
Kilala siya sa kanyang mga kababaryo bilang “Pai Andy.” Pinasubalian nila ang pahayag ng militar na myembro siya ng BHB.
Salaysay pa ng isang kaanak sa kanyang post, “sibilyan po ang pinatay nila…hindi po NPA.” Umapela rin siya sa publiko na sana ay mabigyan ng hustisya ang pagpatay kay Cañaveral.
Matapos ang brutal na insidente, ipokritong nanawagan ang militar sa mga “rebelde” na “magbalik-loob…para sa pagkakataon na magkaroon ng mapayapa at bagong buhay kasama ang kanilang mga pamilya.”
Umapela naman ang BHB-Albay sa mga kagawad ng midya na “maging mapagtuklas sa katotohanan ng inyong mga balita at hindi dapat umaayon lamang sa iskrip ng inyong mga station manager o ng sinuman na mas mataas sa inyo.”