Karapatan sa pangisdaan, isusulong ni Arambulo sa Senado – Pinoy Weekly

August 19, 2024


Nagdeklara ng kanyang kandidatura para sa pagkasenador ang mangingisda at kasalukuyang pangalawang tagapangulo ng grupong Pambansang Lakas ng Kilusang Mamamalakaya ng Pilipinas (Pamalakaya Pilipinas) na si Ronnel Arambulo nitong Ago. 19.

Tatakbo si Arambulo sa ilalim ng Makabayang Coalition kasunod ng opisyal na anunsyo nilang maglatag ng senatorial slate sa darating na halalan sa 2025.

Isusulong ni Arambulo ang panawagan ng sektor na kanyang kinabibilangan para sa karapatan sa malayang pangingisda.

“Sa mahabang panahon, wala ni isang kumandidato sa interes ng mga batayang sektor, kabilang ang mangingisda,” ani Arambulo sa kanyang deklarasyon sa pagkandidato sa Navotas City.

“Karapat-dapat lamang at napapanahon nang magkaroon ng tinig ang mangingisda sa Senado,” dagdag pa niya

Lider-mangingisda na si Arambulo mula noong 2008 at masugid na tagapagsulong ng mga kampanya sa pagtatanggol sa mga komunidad sa baybayin at mga lugar ng pangingisda laban sa reklamasyon at pribatisasyon.

Si Arambulo ang ikalimang kandidato sa ilalim ng Makabayan, kasunod ng proklamasyon nina ACT Teachers Partylist Rep. France Castro, Gabriela Women’s Party Rep. Arlene Brosas, Jerome Adonis ng Kilusang Mayo Uno at dating anti-poverty czar Liza Maza.



Source link

Pinoy Weekly

Ang Pinoy Weekly ay pahayagang online at print na naglalathala ng mga istorya, imahe at opinyon ng mardyinalisadong mga sektor ng lipunan, kabilang ang mga manggagawa, magsasaka, kabataan, kababaihan, migrante at iba pa. Maliban sa paglalathala sa internet, naglalabas ang Pinoy Weekly ng lingguhang magasin, gayundin ang Pinoy Weekly Special Issues.

Don't Miss