Ni George Tumaob Calaor
Sa ngalan ng huwad na kooperatibismo at modernisasyon
trabaho, kabuhayan at buhay namin…
kapakanan at kinabukasan ng pamilya namin…
15 na araw na lang… iyon ang taning.
15 na araw na lang kaming kakain
at pagkatapos nito, ay wala rin kaming
maibabayad sa upa ng tinitir’han namin…
15 araw na lang na may liliwang
sa gabing kadiliman ay magngitngit
at wala na rin kaming pambayad sa kuryente
at sa init ay putik na manlalagkit ang buhay namin…
15 na araw na lang ang ihihinga namin
pagkat sa karukhaan at imbing gutom
kami ay buhay na ililibing.
Konsolidasyon ang tawag
sa konsolidadong pagsiil
at pagkitil sa buhay
at kabuhayan namin!
Konsolidasyon at sa lawak din
ng konsolidadong paglaban maipagtatanggol
ang katarungan at kabuhayan
pagkat ang mabuhay ay karapatan…
ituloy ang laban natin!