PRWC
Mabaskog nga ginakondenar sang Leonardo Panaligan Command-New People’s Army ang asud-asod nga pagpangharas sang mga katapo 62nd sa mga sibilyan kag mangunguma sa banwa sang La Castellana kag syudad sang Guihulngan kahapon nga adlaw, Enero 14, 2024.
Puguso nga ginransak sang 40 ka tropa sang berdugong 62nd IB ang puluy-an sang pamilya Carreon sa sityo Bonbon, Barangay Hinakpan, Guihulngan City alas 11:30 sang aga, Enero 14, 2024. Ginpang-ukay sang pasistang tropa ang mga kagamitan sang pamilya Carreon kag ginpangita si Bimbo Carreon-tagbalay kag mangunguma. Ginpahug ang mga tawo sa sulod sang balay lakip na ang mga gagmay nga kabataan sang nasambit nga pamilya.
Sini man nga adlaw (Enero 14), pasado alas 4:00 sang hapon, desperado nga gintiro sang tatlo ka armado kag nakasibilyan nga mga tawo si Cerilo Bagnoran Jr. Nagamaneho sang iya motorsiklo si Bagnoran halin sa iya trabaho padulong sa ila puluy-an sang ginpara kag gilayon ginpa-arakan luthang sang nasambit nga tatlo ka tawo sa Crossing Cordova, Barangay Manghanoy, La Castellana, Negros Occidental. Nakaluwas ang biktima, apang nagtuga sang kakugmat sa pamilya Bagnoran. Si Cerilo Bagnoran Jr, ang kilala sa lugar nga isa ka sibilyan kag mamumugon sa kampo. Antis pa man sang insidente, Enero 7 may duha na ka tawo nga nagpakilala mga katapo sang Philippine National Police (PNP) nga nagpangita sa iya sa lugar. Enero 8, byente kwatro ka tropa sang 62nd IB nga naga-operasyon ang liwat naman nagpangita kay Bagnoran sa sityo Mandayao-4, Barangay Kamandag, La Castellana, Negros Occidental. Sa inisyal nga pagpangusisa sang LPC-NPA sa mga residente, mga katapo sang 62nd IB Charlie Company ang tuyo nga magpatay kay Bagnoran.
Ang pagpanglagas kag paghingabot sa mga inosenteng sibilyan sang 62nd IB sa pagpanguna ni William Pesase Jr, 62nd IB Commanding Officer, ang klaro nga paglapas sang tawhanon nga kinamatarung, CARHRIHL kag rules of war. Ini ang isa ka mahigko nga taktika sang reaksyonaryong gyera nga ginalunsar sang AFP indi pa batok sa CPP-NPA kundi sa mga mangunguma nga ginapasibangdan nga mga “NPA supporters.” Bangud sang pasulit-sulit nga pagtalana sang deadline, ini man ang desperado nga tikang sang berdugong tropa sa pagwasak sang rebolusyonaryong kahublagan ilabe na ang CPP-NPA sa Central Negros.
Ihatag ang nagakaigo nga hustisya sa mga biktima sang 62nd IB. Pabayaron sang dako ang berdugo kag pasistang 62nd IB paagi sa lapnagon kag madinalag-on nga taktikal nga opensiba sang Bag-ong Hangaway sang Banwa!
