PRWC
Nakugmat kag namuragmuragan ang nagakatulog pa nga mga residente sang mga barangay sang Nagsaha, Balugo, Magsaysay, Villegas kag Imelda, tanan sakop sang Guihulngan City, Negros Oriental sang asud-asod nga nabatian sini ang tatlo ka dalagko nga lupok halin sa Brgy. Villegas Army Detachment alas 5:00 tubtob 6:30 sang aga, Agosto 5. Halos isa ka oras kag tunga ang mabatian nga paglinupok sang mortar. Nagtupa ang mortar tanan sa lasang sang “issi” (ginatawag sang Guihulnganon sa nasambit nga lasang) nga nahamtang sa mga border sang Brgy. Nagsaha, Villegas, Magsaysay kag Imelda.
Ang lasang sang “Issi” ang may mga pananom sang mangunguma kaangay sang kararuton kag utanon. Samtang ang mga karabaw, baka kag kanding sang mga residente sa palibot sang lasang ang dira man ginapanglawig kag ginapaharab.
Dako ang kabalaka sang pumuluyo sa ila seguridad kag pangabuhian sa lugar bangud tubtob subong wala pa nila mausisa ang ila uma kag kasapatan bangud sang kahadlok tuga sang patarasak nga pagpalupok sang mortar sang militar. Samtang ara man gihapon ang presensya sang militar sa lugar nga nagapang-interogar sa mga residente kag nagapalupad sang mga drones.
Ang patarasak nga pagpamomba sang 62nd IB kag 7th RMFB sa Guihulngan City makaduha na ka beses nga ila ginhimo sa sini lamang nga semana. Agosto 3 alas 8:00 pasado sang aga-patarasak nga nagpalupok sang grenade launcher ang katapo sang 7th RMFBn sa Brgy. Magsaysay.
Nadumduman Oktubre 31, 2022-dose (12) man ka mortar ang patarasak nga ginpalupok sang 62nd IB sa Mount Cansanda nga nahamtang sang boundary sang Brgy. Balugo kag Brgy. Magsaysay, Guihulngan City.
