PRWC
Indi matuod kag kabutigan ang mga balita nga ginpaguwa sang 94th IBPA nga may natabo nga duha ka beses nga engkwentro sa tunga sang yunit sang Mt. Cansermon Command-New People’s Army (MCC-NPA) kag sa nasambit nga militar sa nabukid nga bahin sa Barangay Lower Carol-an, Kabankalan City, Negros Occidental kagahapon sang hapon petsa 6 sang Mayo, 2024.
Una, wala sang yunit sang NPA sa subong sa amo nga nasambit nga baryo kag tanan nga yunit kag tropa idalom sang MCC-NPA ang matawhay kag padayon nga nagapatuman sa ila tagsa ka hilikuton sa natalana nga lugar sa pihak sang masingki nga operasyon militar sa mga baryo sang Kabankalan City kag Himamaylan City, Negros Occidental nga nagalawig na sang pila ka bulan.
Ikaduha, ginatan-aw subong sang MCC-NPA ang lain naman nga posibleng pagpanglapas sa tawhanon nga kinamatarung ang nakomiter sa tropa sang 94th IB sa amo nga lugar kag ginatabunan nalang sang ila pagbalita sang peke nga enkwentro.
Madumduman nga kaangay sang mga nagligad nga binulan sa kada magbalita sila sang peke nga enkwentro kag kuno may nakuha sila nga mga armas, may ara naman mga inosenteng mangunguma ang iligal nga ginadakop, ginakastigo kag ginaimbestigar.
Sadtong bulan sang Oktubre, Nobyembre kag Disyembre 2023, nagpagwa man sang mga balita sang peke nga engkwentro ang Armed Forces of the Philippines (AFP) partikular ang 94th IB kaangay sang ila iligal nga pagpangdakop kay Joel Casusa, Jenny Radles kag Pokoy Ribradilla nga ginpang-akusahan nga kuno mga katapo sang NPA.
Kaangay sang amo nga hitabo, ginakahangawa sang MCC-NPA Ang pattern o padron sang panghitabo nga sa kada peke nga balita nga ginpaguwa sang AFP may inosenteng sibilyan ang nabiktima.
Ginkundenar sang MCC-NPA ang amo nga modus sang AFP kag hugot nga ginapakamalaot ang pagtabon sang ila mga kalapasan paagi sang mga peke nga engkwentro.
Dugang dire, katuyuan man sang AFP nga dulaan sang balor ang asud-asod nga mga madinalag-on nga aksyon militar sa nagligad lang nga duha ka semana sa bilog isla. Gusto man ipagwa sang miltar sa publiko nga kuno padayon ang ila pag-angkon sang mga kadalag-an kag lubos na matuman ang ila handum nga mawasak ang NPA sa katapusan sang Hunyo ukon indi man sa katapusan sini nga tuig. Paagi sang ila pagpahamtang sang Isla sang Negros sang SIPS, nagahandum sila sang imposible nga butang kag nagahatag sang sala nga pagpati sang publiko paagi sang pagginahud sa sosyal midya. ###
