PRWC
Iti laksid ti kannigid kannawan a panaggigiddan dagiti heneral ken ti mismo danog iti bulan a pablaak ni Marcos Jr nga awanen dagiti aktibo a larangan gerilya iti intero a pagilian, agtultuloy met latta ti deployment kadagiti barbaro a pwersa ti AFP kadagiti probinsya ken barbaryo iti kaaw-awayan. Nayon dagitoy kadagiti siguden a pwersa nga inggana ita ket awan-ressat nga agisaysayangkat ti focused military operations ken agin-indeg kadagiti baryo iti linged ti retooled community support program.
Iti kinapudno na, kadaytoy laeng Enero 16 ket pinarubwatan babaen iti send-off ceremony ti nasurok 100 a barbaro a soldado ti 5th Infantry Division nga ipakat iti naduma-duma a probinsya tapno “naan-anay a gibusan ti insurhensiya iti masakupan ti 5th D” a pakairamanan ti Cagayan Valley. Kasinnupadi daytoy kadagiti ilaslastog ni MGen Audrey Pasia, kumander ti 5th ID, idi Disyembre nga “awanen ti kabaelan” ti NPA iti rehiyon nga agirussuat ti pulitiko-militar militar a trabaho ken tantan-awaganen ti 5th ID ti “total victory” da laban iti NPA-CV kadaytoy umuna a paset ti 2024.
Mano aldaw met lang sakbay dagitoy, impablaak ti Northern Luzon Command (Nolcom) nga itultuloy da latta dagiti security operations ken security engagements da ita a tawen. Impudno mismo ti Nolcom a saan da nga agkamkampante kadagiti ibagbaga da a “tedteda” a kameng ti NPA a posible latta a makairussuat kadagiti rebolusyonaryo a trabaho.
Ammo la unay dagiti umili nga ubbaw dagitoy a pakdaar ni Marcos Jr ken ti AFP. Pasig a desperado nga addang ken konswelo de bobo laeng dagitoy tapno pagmawmawen ti risiris ken bittak iti uneg ti AFP nga aggangandat ti kudeta laban kenkuana.
Agdadata a ti rebolusyonaryo a tignayan ken NPA pay latta ti pokus ti AFP, imbes koma a pagsaganaan ken intunaran na nu kasano a salakniban ti pagilian laban iti umir-irteng nga armado a komprontasyon ti US ken China.
Agtaltalinaed a natibker dagiti yunit ti NPA iti Cagayan Valley numanpay adda dagiti napasaran a dangran ken panagsanud kadagiti naglabas a tawen. Dakkel a tulong ken tarabay ti tignayan a panagilinteg ti PKP tapno paggil-ayaben manen ti rebolusyonaryo a pakinakem ken optimismo dagiti kadre ken kameng ti Partido ken dagiti Nalabaga a kumander ken mannakigubat ti NPA ken tapno nasirib nga adawan ti adal dagiti nagbiddutan ken determinado a paayen ti estratehiko nga opensiba ti kabusor.
Daldaliasaten itatta ti sibubukel a rebolusyonaryo a pwersa iti rehiyon ti dalan ti panagpabaro’t pigsa ken panagabante manen. Agtaltalinaed a nadam-eg a daga ti Tanap ti Cagayan para iti panagwaras ti apoy ti gubat ti umili. Iti panagkaro ti panagmiraut dagiti mannalon ken dadduma pay a demokratiko a sektor, agtaltalinaed kas kangrunaan a gaway ti umili ti New People’s Army.
Nalaos ti determinasyon ti NPA-Cagayan Valley nga agirussuat kadagiti aksyong militar basar iti kabaelan ken kadagiti pannakidangadang a masa nga anti-imperyalista, antipyudal, at antipasista nangruna ta maysa ti rehiyon kadagiti kangrunaan a maapektaran ti El Niño kalpasan ti nagsasaruno a bagyo ken nasaknap a panaglayus inggana idi Disyembre.
Kadagiti kaaw-awayan ken nasulinek a luglugar, ti latta NPA ken dagiti naan-anay a timpuyog ti masa kas bin-i ti demokratiko a gobyerno ti umili ti mapagsanggiran ti masa gapu ta inggana ita, iti radyo laeng ti pakangegan ken pakadamagan dagiti mannalon ken nailian a minorya ti ibagbaga ti estado a “pangdur-as” wenno “ayuda” wenno “tulong ti rehimen Marcos.”
