PRWC
Mabaskog nga ginakondenar sang Leonardo Panaligan Command-New People’s Army ang brutal nga pagpatay kay Anthony Curson “Ka Miguel,” 22 anyos sang mga katapo sang pasista kag berdugong 62nd IB sa sityo Malatanglad, Brgy Budlasan, Canlaon City alas 3:00 sang hapon, April 28, 2023. Si Curson ang naga-antus sa kasakit sang iya mga tiil. Nagahubag ang iya mga tiil kag paa nga halos indi na makalakat bangud sang deperensya sa iya kidney. Isa ka Pulang Hangaway apang makabig nga Hors de combat si Ka MIGUEL bangud sang gina-antus sini nga sakit.
Sandig sa pagpangusisa sang LPC sa lugar, wala sang lehitimo nga engkwentro nga natabo kundi ilegal nga gin-aresto si Ka Miguel kag brutal nga ginpatay sang militar ang biktima sa puluy-an mismo ni Leonido Montero, legal ang edad, may asawa kag kabataan sang nasambit na nga sityo. Wala man sang search warrant kag warrant of arrest nga ginpresentar ang militar. Pareho nga ilegal gin-aresto, wala kaluoy nga gintorture kag gintamnan sang mga armas sang operating troops sang 62nd IB si Anthony kag Leonido. Hungod nga ginpatay sang militar si Anthony samtang ilegal nga gin-aresto si Leonido. Taliwas ini sa ginasugid sang mga katapo sang militar ilabe na ni Lt/Col. Van Donald Almonte sang 62nd IB. Gusto lang hinabunan sang militar ang ila kapalpakan paagi sa mga “peke nga engkwentro.” Makàhuluya kag daw buka nga plaka si Almonte kon maghambal sa paglubid sang ila mga kabutigan sa publiko.
Si Leonido Montero, mangunguma, sibilyan kag tag-iya sang balay diin dira ginpatay si Ka MIGUEL. Si Montero tuig 2017 pa nga ginaredtag sang militar, kapulisan kag NTF-Elcac. Ginapasibangdan nga “suporter sang NPA” sa lugar. Lunsay patu-pato ang mga kaso nga ginpatong sang otoridad kay Leonido Montero.
Ang brutal nga pagpatay kay Ka MIGUEL kag ilegal nga pag-aresto Kay Leonido Montero sang 62nd IB ang nagalapas sa CARHRIHL kag laye sa gyera sa tunga sang nagaluntad nga civil war sa pungsod. Ang palisiya sang militar nga “wala dakpon nga buhi sa NPA” ang nagapakita sang pagka-desperado sini sa pagpakig-away sa bug-os nga rebolusyonaryong kahublagan.
