PRWC
Ginakundenar sang Armando Sumayang Jr Command-New People’s Army (ASJC-NPA) ang pagtortyur kag pagpatay sang isa ka mangunguma sang mga tropa sang 15th IB sang Armed Forces of the Philippines (AFP) kag Special Action Force (SAF) sang Philippine National Police (PNP) sa Sityo Pasto, Barangay Basak, Cauayan, Negros Occidental sang ala-1:00 sang hapon sang Hulyo 29, 2024.
Ginkilala ang biktima nga si Ramon Enseniales, 69 anyos, nagpuyo sa Purok 1, Barangay Abaca, Cauayan. Natulog sa isa ka balay si Ramon sa Sityo Pasto, sang gin-reyd ang balay, alas-10:00 sang aga, sang mga tropa sang 15th kag SAF. Gindakop siya kag gindala sa lasang kag didto wala kalooy nga gintortyur antes ginpatay sang ala-1:00 sang hapon sa amo nga adlaw.
Indi matuod nga katapo si Ramon sang NPA. Isa siya ka sibilyan kag wala sang ikasarang nga magbato. Masobra na dekada nga ginalagas si Enseniales sa mga katapo sang AFP-PNP kag nagapalagyo sa ila lugar agud maluwas ang iya nga kabuhi.
Malawig na nga nagtinguha ang mga tropa sang AFP-PNP nga matapos na nila ang kuno pipila nalang nga nabilin nga NPA dire sa Sur nga bahin sang Negros. Bangud wala sila sang nahalitan nga yunit sang ASJC-NPA, ginahimo nila nga pamatyon ang mga sibilyan nga wala sang ikasarang nga magbato kag ibandera ang mga biktima nga mga katapo sang NPA.
May daku nga salabton ang AFP-PNP kag ang rehimen ni Marcos Jr sa mga krimen nila sa pumuluyo. Lapnagon ang ekstrahudisyal nga pagpamatay kag ang wala untat nga militarisasyon sa kaumhan. Padayon naton nga ipanawagan kag silotan ang mga bat-ulan nga mga kaaway kag angkunon ang hustisya para sa tanan nga mga biktima sang pasismo kag impunidad sang rehimen Marcos Jr.###
