PRWC
Kapin sa 100 ka tropa sang berdugong 62nd IB ang liwat naman naglusob sa komunidad sang Indigenous People (IP’s) sa Sityo Caliban, Brgy. Banog-banog, Isabela, Negros Occidental subong nga adlaw.
Naglab-ot sa duha ka kolum sa tropa militarang nag-okupar sa nasambit nga sityo. Nagapangsaka-saka kag nagatiner sa mga kabalayan. Nagtuga sang kakugmat kag perwisyo ang presenya sang militar sa mga kabataan kag mga residente sa lugar. Nagapangsita, naga-imbestigar kag nagapanuhot-suhot sa mga kalibunan. Ginapanglapak sang militar ang mga pananom sang mga mangunguma sa pihak sang grabe pa nga halit sang bagyo Dodong kag bagyo Egay sa ila pananom kag palangabuhian. Samtang may isa pa ka kolum sang pasistang militar sa Sityo Hinagduan, Brgy Riverside sang amo gihapon nga banwa.
Hulyo 31 tubtob subong Agosto 2, padayon nga nagalambiyong ang tatlo ka kolum sang pasistang tropa militar sa mga sityo sang Agogolo, Tubod kag Brgy. proper sang Brgy. Macagahay, Moises Padilla, Negros Occidental. Nagatiner sa Brgy. hall kag mga kabalayan sang nasambit nga baryo. Ginabulubanta mga 150 ka tropa militar ang nag-okupar sa lugar.
Sa Guihulngan City, padayon nagatiner ang kapin sa 100 man ka elemento sa 62nd IB sa Kambairan Elementary School sakop sang Brgy. Trinidad. May isa man ka kolum nga nagapanglusob sa mga kabalayan sa Sityo Amumuyong, Brgy. Trinidad kag sa mga kasikbit pa nga mga sityo.
