PRWC
Sang nagligad lang nga semana, ang pwerte ka baskog nga hangin kag ulan dala sang mga asud-asod nga bagyo kag ginpabaskog nga hangin Habagat ang nagdala sang peligroso nga baha kag kahalitan sa mga pumuluyo sa South Central Negros, nanguna sa syudad sang Kabankalan kag Himamaylan, kag mga banwa sang Binalbagan kag Hinigaran, tanan sakop sang Negros Occidental. Ini sa tunga pa sang peligro sang posible nga paglupok sang bulkan Kanlaon.
Bunga sini, ginamandoan sang Mount Cansermon Command-New People’s Army (MCC-NPA) ang mga yunit sini nga mag-upod sa mga rebolusyonaryong organisasyon masa para gilayon mabuligan ang mga nagkalaguba nga balay kag uma sang pumuluyo. Ang masang mangunguma kag tumandok kinahanglan organisahon kag pahulagon para sa pagpabangon sang ila palangabuhian.
Magluwas sini, ginapanawagan man sang MCC-NPA ang pumuluyo nga mag-isa para magdemanda sang husto kag nagakaigo nga bulig halin sa reaksyunaryong gobyerno. Madumduman nga wala lang madugay kag wala pa lubos nga nakalampuwas ang kadam-an sa halit sang El Niño kag inpestasyon sang army worms, kag karon gina-atubang naman ang mabaskog nga ulan kag pagbaha.
Dapat nga sukton ang mga yara sa poder sa ila nga responsibilidad sa pumuluyo, kag indi dapat magpakuntento sang mga “pakitang-tao” nga bulig nga indi makatrespaser sa panginahanglan para makabawi sa minilyon nga halit sang mga nag-agi nga katalagman. Lakip na sini ang pagpahalin kag pagbato kontra sa padayon nga militarisasyon sa kaumhan nga ginapangulohan sang 94th IB kag NTF-Elcac, nga dugang man nagapaantus sa masang pigos.
Subongman, dapat kolektibo nga batuan ang pagsulod sang mga proyekto sa mina kag kwari, komersyal nga pagtanom-kahoy, kag iban nga mga iskema sang land-use conversion kag pagpang-agaw sang duta sang mangunguma kag tumandok. Maathag nga ang ini nga mga proyekto ang nagdugang pa sa palas-anon sang pumuluyo. Bangud nagapanghalit ang mga ini sa duta kag kinaiyahan, ang panguna nga mangin biktima sa tion sang mga bagyo kag iban pa nga kalamidad amo ang pumuluyo. Samtang, ang mga dalagko nga agalon mayduta kag kumprador burgesya nga nagapanag-iya sang sini nga mga proyekto ang nangin bulahan sa ganansya, kag igo lang maghalin matapos makatuga sang kahalitan sa mga komunidad.
Dapat nga magpreparar kag magbuligay ang masa sa panahon sang katalagman. Ilabi na sa katalagman sang neoliberalismo, kon sa diin ginapasulod sang reaksyunaryong gobyerno ang mga makahalalit nga mga negosyo sang lokal kag dumuluong sa ila kadalok sang hilaw nga materyales kag superganansya. Kinahanglan maghugpong ang pumuluyo nga indi magpasugot sa pagguba sa kinaiyahan kag ila nga pangabuhian paagi sa sini nga mga proyekto, kag kinahanglan militante man nga batuan ang paggamit sang reaksyunaryong tropa agud piliton ang pumuluyo nga magpasugot sa mga mina, kwari, kag iban pa. Ang NPA bilang matuod nga tigpangapin sang masang pigos kag ginahimuslan, sa gihapon padayon nga nagapasulong sang armadong paghimakas agud silutan ang mga nagahari nga sahi kag dumuluong monopolyong korporasyon nga nagawasak sang kinaiyahan paagi sa ila neoliberal nga mga proyekto kag nagapang-agaw sang dutang pangabuhian sang mga mangunguma kag mga tumandok.
