Indi matuod nga katapo sang Mt. Cansermon Command-New People’s Army (MCC-NPA) ang gindakop kag ginpresentar sang 94th IB kag PNP-Himamaylan City nga si Ray Vinces de Leon, soltero kag mangunguma, sang Sityo Cantupa, Barangay Buenavista, Himamaylan City, Negros Occidental, sadtong Enero 21, 2024.
Si de Leon, ang iya amay nga si Deloy, kag si Remy Villacanao, isa man ka mangunguma sa katambi nga sityo, ang gindakop pasado alas 4:00 sang kaagahon sa ila tagsa ka balay samtang nagakatulog. Ang tatlo pareho nga mga katapo sang lokal nga asosayon sang mangunguma nga Kauswagan sang mga Mangunguma sa Barangay Buenavista ukon KMB. Isa man ka lider-simbahan si Deloy de Leon.
Isa ka kabutigan kag pagpaniplang ang ginhimo nga pagpresentar sang 94th IB sang mga daan kag pila na ka tuig nga mga piktyur kaangay sa kay Vinces de Leon para ipagwa nga katapo sang NPA ang gindakop sa nasambit nga militar.
Ang matuod, tuig 2017 sang nagsulod sa NPA si de Leon apang wala ini naglawig. Sang nagpahuway siya, nagapanguma na lang sadtong 2018. Indi man ini aktibo sa armadong kahublagan sa pila na ka tuig. Nagsurender si de Leon sa 94th IB sang tuig 2020 sang nagpatigayon ang nasambit nga militar sang Retooled Community Support Program (RCSP) sa ila komunidad. Tuig 2020 man sang ginpahug siya sa militar bangud wala siya nagpasugot sa ginpahimo sa iya nga magbalik sa NPA, magkuha sang armas kag mangin espiya sa sulod sang yunit sang NPA. Amo ini ang rason nga naghalin siya sa ila lugar kag napilitan nga magpanago sa iya mga himata.
Subong, ginpriso sa militar si de Leon kag ginpasakaan sang mga pato-pato nga kaso samtang ginbuhian ang amay sini kag si Villacanao. Wala pa gihapon ginpagwa kag ginpakita sa pamilya si De Leon. Tubtob subong, padayon man nga gina-ipit kag ginapahug sang 94th IB ang iya pamilya.
Ini na ang ika-tatlo ka kaso sang iligal nga pagpangdakop sang 94th IB sa sakop sang Barangay Buenavista sulod lamang sa tatlo ka bulan kag naglab-ot sa anum ka mangunguma ang mga biktima. Madumduman nga sang nagligad Nobyembre 2023, gindakop man sang nasambit nga militar ang duha ka mangunguma nga sanday Joel Casusa kag Jenny Radles sa amo gihapon nga sityo. Iligal man nga gin-aresto sang mga soldado si Pokoy Rebradilla sa Sityo Karanawan sadtong Disyembre 2023 sa amo gihapon nga baryo. Sila tanan mga katapo sang KMB.
Masami nagakahadlok ang mga pumuluyo, ilabi na ang mga mangunguma, sa asud-asod nga pagpang-ipit kag pagpamilit sang 94th IB nga mangin asset sang militar kag magkontra sa rebolusyonaryong kahublagan. Masami man nga mapilitan nga maghalin sa ila pangabuhian ang mga mangunguma bangud sa kahadlok para sa ila kabuhi kag pamilya.
Ginhimo man sa 94th IB ang pagpagwa sang mga peke nga engkwentro agud hinabonan ang ila mga krimen batok sa pumuluyo. Nagprensentar man sila sang mga peke nga ‘surrenderees’ para sa ila puno sang korapsyon nga programa sang E-CLIP.
Ginapanawagan sang MCC-NPA sa pamilya sang mga biktima sang iligal nga pagpang-aresto sang 94th IB nga dapat manindugan kag ipakigbato ang ila kinamatarung bilang mga sibilyan. Dapat maghiliusa ang bilog pumuluyo agud mahatagan sang hustisya ang mga biktima sang paglapas sa tawhanon nga kinamatarung nga ginkomiter sang 94th IB kaangay sang ekstrahudisyal nga pagpamatay, pagpanglugos, pagpangbomba, pagpamahug, pagpangransak kag iban pa.###