PRWC
Madinalag-on nga ginpatuman sang isa ka yunit sang Leonardo Panaligan Command-New People’s Army ang operasyon dis-arma kag pagpa-andam kay Pen-pen Fajardo sang sityo Mora, Barangay Pinukawan, Vallehermoso, Negros Oriental sadtong Agosto 13, 2023.
Si Fajardo ang katapo sang Guardians nga may angot sa militar. Palahubog, abusador kag nagapamahug sa mga residente sa lugar. Taghupot sang ilegal nga armas-luthan kag masami nagapalupok sang armas kon mahubog. Nagtuga sang kahadlok kag kakugmat sa pumuluyo.
Nakumpiska sang NPA kay Fajardo ang 4 ka pistola (isa ka .38 caliber pistol, isa ka .357, duha kafrontier) kag mga bala.
Indi tanan nga katapo sang Guardians ang target sang NPA kundi ang kaangay lang sang may kontra-pumuluyo nga kalakasan ni Pen-pen Fajardo.
Samtang, ginapanaugan man sang silot kamatayon sang Rebolusyonaryong Korte sang Pumuluyo si Jomarie Benitez sang sityo Inarawis, Barangay Quinten Remo, Moises Padilla, Negros Occidental sadtong Agosto 5, 2023 sang gab-i.
Wala duha-duha nga ginpatuman sang yunit sang Leonardo Panaligan Command-New People’s Army ang nasambit nga pagsilot kay Jomarie Benitez sa masunod nga mga kaso:
1. Si Jomarie ang responsable nga nagagiya sa tropa militar sa brutal nga pagpatay kay Jose “jojo” Albores sang Lower Tiyos, Barangay Quinten Remo, Moises Padilla sadtong Abril 18, 2023.
2. Responsable man siya sa paggiya sa militar sa pagmasaker sa pamilya Ramirez sadtong Mayo 20, 2023 sang kaagahon diin brutal nga ginpatay sang militar ang mag-asawa nga sanday Julieven Ramirez kag Evelyn Meren. Patay man si Ruben Obidas, Alvin “Ka Dagger” Bayno kag Julwar “Ka Ryan” Lobiano.
3. Siya man ang nagtudlo sa militar sa nahamtangan sang pilason nga si Marvic Ebarle kag Romy Catasio sa Barangay Montilla, Moises Padilla samtang nagapaayo ini. Nadumduman, brutal nga ginpatay si Ebarle kag Catasio sang berdugong 62nd IB samtang nagahulat ang duha sa ila masakyan sadtong Hulyo 20, 2023 sang gab-i sa sityo Balunggay, Barangay Montilla, Moises Padilla, Negros Occidental.
Silotan ang mga traidor sa pumuluyo upod sa berdugo, pasista kag mersenaryong militar! Isulong ang inaway banwa tubtob sa kadalag-an.#
