PRWC
Isa ka lunsay sibilyan kag indi katapo sang New People’s Army (NPA) ang gindakop sang gintingob nga tropa sang 2nd Negros Occidental Provincial Mobile Force Company (2nd NOCPMFC), Philippine National Police (PNP) Himamaylan City kag PNP Kabankalan City, Regional Mobile Force Battalion 6 (RMFB 6), PNP Special Action Force (SAF), 94th IB kag mga police kag military intel sa Sityo Calasa, Brgy. Caradio-an, Himamaylan City, Negros Occidental sadtong Hunyo 25.
Chairman sang Baclayan, Bito, Cabagal Farmers and Farm workers Association (BABICAFA) ang gindakop nga si Susan Medes, 58 anyos, isa ka mangunguma kag nagapuyo sa Sityo Bito, Brgy. Buenavista sa nasambit nga syudad. Ginpato-patoan siya sang kaso nga murder kag frustrated murder kaangot sa natabo nga ambus sa Sityo Bunsad, Brgy. Tan-awan, Kabankalan City, Negros Occidental sadtong Mayo 12, 2018.
Ang ini nga natabo nga dako nga operasyon sa gintingub nga tropa sang PNP kag 94th IB nagapakita kon ano ka militarisado ang sakop sang Himamaylan City kag Kabankalan City. Kadungan sini nga militarisasyon ang madamo nga rekord sang mga paglapas sa tawhanon nga kinamatarung nga ginkomiter sa AFP kag PNP sa lugar, kag nagapanguna nga biktima sini ang mga mangunguma sa kabukiran.
Si Susan Medes asawa ni Rodrigo Medes nga gindakop man sang mga katapo sang pulis kag militar upod sa apat pa ka mga residente kag isa ka pastor sang United Church of Christ of the Philippines (UCCP) sa Barangay Buenavista sadtong Hunyo 26, 2019 sa parehong pato-pato nga kaso kag ginapasibangdan nga mga katapo sang NPA kag tubtob subong ara lang gihapon sa prisohan. Lunsay nga mga aktibong katapo sang BABICAFA ang mag-asawa kag lideres sa amo nga asosasyon. Madugay na nga gina-initan ang ila pamilya upod sa ila asosasyon bangud sa mga kadalag-an nga naangkon sa ila asosasyon ilabi na sa mga lehitimo nga mga demanda sa mga mangunguma para sa pangabuhian kag duta.
Kaangay man sa pamilya Fausto nga mga aktibo nga myembro sang BABICAFA kag iban pa nga mga katapo sang amo nga asosasyon nga nagasakdag sa ila interes kag kinamatarung, biktima ang pamilya Medes sa red-tagging, pagpamahug nga patyon, sarbeylans, intimidasyon, pagpangransak sa ila kabalayan kag pangpangdakop sang AFP, PNP kag National Task Force (NTF)-Elcac.
Base sa inisyal nga report, matapos ang natabo nga pagmasaker sang mga katapo sang 94th IB sa pamilya Fausto sa Sityo Cangkiling, halos wala na untat ang operasyon militar sa erya nga natabuan kag sa mga katambi sini. Ginhambalan sang mga militar ang pumuluyo sa amo nga lugar nga “dapat na maghalin ang pumuluyo dire” kag “no man’s land” na kuno ang lugar. Bangud sa kahadlok, naghalin ang mga mangunguma kag isa na dire ang pamilya ni Medes.
Ang pagdakop sa isa ka sibilyan kag lunsay mangunguma kaangay ni Susan Medes kag pagpasibangud nga katapo siya sang NPA pagpahamot lamang sang AFP/PNP/NTF-Elcac sa publiko nga nagapaningkamot sila sa paglagas sa NPA kag paghinabon sa ila brutal nga pagpatay sa pamilya Fausto sadtong tinalikdan Hunyo 14. Nagasabwag man sang kabutigan ang AFP/PNP/NTF-Elcac paagi sa midya kag iban pa nga news platform apang indi nila matiplang ang mga Himamaylanon kapin pa ang mga nakakilala sa mga biktima sang pagpamatay, pangpangdakop kag iban pa nga mga bayolasyon sa tawhanon nga kinamatarung.
Lubos nga ginkundenar kag ginpakamalaot sang Mount Cansermon Command (MCC-NPA) ang asod-asod nga mga kalapasan nga ginhimo sang tropa sang 94th IB kag mga katapo sang PNP kon sa diin pinakaulihi ang pagdakop kay Susan Medes kag wala kaluoy nga pagmasaker sang pamilya Fausto.
Padayon nga nagapanawagan ang MCC-NPA sa mga taong-simbahan, local government units, human rights advocates kag peace-loving people nga mabuligan kag maprotektahan ang mga pumuluyo ilabi na ang mga biktima sang pagpang-atake sang mga pasistang AFP/PNP/NTF-Elcac. Hatagan man sang igtalupangod ang sunud-sunod nga mga nagkalatabo sa Himamaylan City kag mga katambi sini nga syudad kag mga banwa.
Pasabton sang MCC-NPA ang 94th IB kag ang mga traydor sa rebolusyonaryo nga kahublagan nga may utang nga dugo sa pumuluyo agud mahatagan sang hustisya ang mga biktima sa ila madugoon nga kontra-insurhensya nga kampanya.###
