Dili na katingalahan nga ang ikatulong State of the Nation Address (SONA) ni Marcos Jr nagpabilin nga puno sa pagpangilad ug pagpabantog sa iyahang reaksyonaryong administrasyon. Para sa rebolusyonaryong pwersa ug katawhan sa Negros Oriental, wala nay angay lauman sa mga pasalig ug garbosong mga deklarasyon sa usa ka dunot nga gobyerno.
Usa sa pinakadakong yangungo karon sa katawhan sa Negros Oriental ang padayon nga pagsulod sa mga proyektong nagpakaaron-ingnon nga makahatag og panginabuhian apan sa kamatuoran mas nakaguba pa sa kinaiyahan ug sa natukod nga paghiusa sa katawhan. Ang “Tamlang Valley Zone of Peace” layo ra sa kalinaw nga iyahang gideklara tungod sa liboan ka panginabuhian nga maligsan para paboran ang mga neoliberal nga proyekto sa pagmina, pagtanom og pang-export, ekoturismo, ug uban pang interes sa langyaw ug lokal nga mga kasosyo niini nga mao pud ang nagkupot sa gahom. Tamlang ra ang gihinganlan ani nga proyekto, pero ang target ani para sa negosyo sobra sa 300,000 ka ektarya nga mulangkob sa mga lungsod sa Santa Catalina, Siaton, Sibulan, Valencia, Pamplona ug syudad Bayawan.
Bisan nagsugod na ang ting-ulan, wala pa gihapon naka-rekober ang kaumahan ug panginabuhian sa katawhan sa dakong kadaot nga dala sa El Niño. Ang hinabang nga gihatag sa gobyernong Marcos layo ra sa gikinahanglan nila para maulian ilahang mga tanom ug kasapatan. Gani, sumpay sa pagpanghambog ni Marcos Jr sa iyahang programa sa peke nga reporma sa yuta ang pagbawi sa yuta gikan sa mag-uuma nga pugos nga makautang ug himuong kolateral ang ilang kayutaan para lang makapadayon ug makatubag sa ilahang kinahanglanon kada adlaw.
Mas gitagaan pa gani karon og pagtagad ang pag-ayo sa mga karsada para sa neoliberal nga tumong sa nabukid nga bahin sa mga nahisgotang lugar. Kuyog pa niini ang operasyong militar nga klaro pud sa katawhang mga protektador sa interes sa nagharing hut-ong ug nanaog-daog kanila taliwala sa nagkagrabeng krisis nga dugang nagduot sa katawhan sa kawad-on.
Klaro nga gidali-dali ug walay igong basehan ang deklarasyon nga naguba na ang natarang gerilya sa Southeast ug sa ubang bahin sa Negros. Gani, para kini sa nga ekonomikanhon ug militar nga interes sa US ug lokal nga agalong yutaan, dagkong komprador, ug mga burukrata kapitalista. Gipakita ra ni Marcos Jr ang iyahang papel isip itoy sa imperyalistang gahom nga andam na pud muaway sa kabangi niyang itoy nga si Duterte.
Busa, dako nga hagit ang nagpabilin para sa RMPC-NPA kuyog ang katawhang gihimuslan nga ipadayon ug ipaasdang ang demokratikong rebolusyon sa katawhan. Bisan pa nga nakaeksperensya kini og mga pag-atras, dili na mapapas ang makasaysayanon nga tahas sa proletaryado nga ilugon ang gahom politika pinaagi sa buto sa pusil isip nag-inusarang pamaagi para makuha ang tinuod nga kalinong ug demokrasya, nga maoy gisinggit ug gikinahanglan sa katawhang naglunang sa kalisod tungod sa reaksyonaryong pwersa.