(Sa Ika-Limang Taon ng Pag-alaala)
Ni George T. Calaor
Sa lupa ng Panay
may bakas
ng mga paa
na hindi binura
ng ulan…
mga pangalang inukit
sa mga batong dinadaluyan
ng naghihimagsik
na kasaysayan,
umaagos sa mga ilog–
hindi mapipigilan!
Disyembre 30, 2020…
hindi paunang salvo
sa pagsalubong
sa bagong taon
ang umalingawngaw
na mga putok.
Pinasok ng halimaw
na mga bayarang berdugo ng pamahalaan
ang tahanan ng mga Tumandok…
hinila ang katawan
mula sa panaginip–
binaril ang pag-asa
sa harap ng mga bata.
Siyam ang bumagsak–
labing-anim ang ikinulong…
daan-daang mamamayan
ang sapilitang
pinalayas ng dahas
baon ang sugat
ng katahimikan
at magkahalong pait
ng dalamhati
at ngitngit
ng pagkasuklam!
Sabi nila’y kaunlaran,
ngunit dugo ang pundasyon.
Sabi nila’y kaayusan
ngunit baril ang wika!…
at sa anino ng dambuhalang dam,
nakatayo ang mga opisyal–nakangiti
sa harap ng kamera,
nakalimot na
ang lupang tinatapakan
ay libingan ng mga pinaslang ng pasistang estadong buong pagkaalipin nilang
niluluhuran.
Ngunit ang hindi nila batid…
may apoy sa diwa
at lagablab sa puso
ng mga Tumandok
na hindi kayang apulahin
ng kasinungalingan
ni ng sindak
ng pananakot.
Makinig ka sa himig
na hinuhuni ng mga ibon,
sinasabayan ng kaluskos ng mga dahon
at langitngit
ng kawayan
sa gubat
at kanayunan…
may umiindak
na pagbangon,
may humahabi
ng paglaban.
Aangkinin nang lubos
ang kalayaan.
= = = = = =
Naganap ang pag-masaker sa siyam na Tumandok ng rehimeng Rodrigo Duterte sa gabi ng Disyembre 29, 2020.
