Pinoy Weekly
Ngayong Enero, nakapagtala ang pamahalaan ng 8.7% na inflation rate o bilis ng pagtaas ng presyo na pinakamataas sa loob ng 14 na taon. Hinigitan din nito ang pagtataya ng Bangko Sentral ng Pilipinas na 7.5% hanggang 8.5%.
Sa pagtatapos ng 2022, nasa 8.1% ang inflation noong Disyembre at nasa 5.8% ang average inflation para sa buong taon kumpara sa 3.1% na average noong 2021.
Ano’ng ibig sabihin nito para sa mamamayang Pilipino?
Matatandaang sunod-sunod ang pagtaas presyo ng pangunahing bilihin at serbisyo sa nagdaang taon.
At hanggang ngayon, wala pa ring malinaw at makabuluhang hakbang ang administrasyon ni Ferdinand Marcos Jr. mula nang naluklok sa poder upang tulungang maibsan ang paghihirap ng taumbayan dala ng patuloy na pagsirit ng presyo.
Ang malala pa nito, ipinagkait ng pamahalaan ang pangakong P18.5 bilyong targeted cash transfer noong 2022 at tinapyasan ang mga pondo para sa emergency assistance program ng P7.5 bilyon at Pantawid Pamilyang Pilipino Program (4Ps) ng P5.1 bilyong para sa 2023.
Alangan din ang rehimeng Marcos Jr. na itaas ng minimum na sahod at nagdadahilang mas lalong tataas ang inflation kung gagawin ito.
Ngunit pinabulaanan na ito ng Ibon Foundation. Pinag-aralan ng independiyenteng grupo sa pananaliksik ang datos ng pagtaas ng sahod mula 1986. Sa 31 beses na pagtaas ng sahod, 15 beses dito ang sinundan ng mas mabagal na inflation anim na buwan mula ito ipatupad.
Hindi magdudulot ng pagtaas ng presyo ang pagbibigay ng makabuluhang dagdag-sahod sa mga manggagawa kung kukunin ito ng malalaking negosyante sa kanilang tubo.
Dagdag pa ng Ibon, kailangan ding tulungan ang mga micro, small at medium enterprise upang maitaas ang sahod ng kanilang mga manggagawa sa pamamagitan ng wage subsidy at iba pang pinansyal na tulong.
Sa ngayon, kailangang igiit at ipaglaban ng mga manggagawa at mamamayan ang nakabubuhay na sahod upang makaalwan sa walang patid na pagtaas ng presyo.
Napapanahon na para sa mas malakas na daluyong ng kilusang paggawa.
