Nananawagan ang Partido Komunista ng Pilipinas (PKP) sa sambayanang Pilipino na ilantad at batikusin ang Armed Forces of the Philippines (AFP), partikular na ang 20th Infantry Battalion ng Philippine Army, dahil sa labag sa batas na pagpapataw ng militar ng mga lockdown sa mga komunidad ng magsasaka ng Northern Samar, at pagpapailalim sa libu-libong mamamayan sa mabibigat na patakaran at hakbang. Mula pa Hulyo 19, isinalilalim sa lockdown ang mga residente ng mga barangay ng Hitapian at San Vicente sa bayan ng Catubig, gayundin ang mga taga-Barangay San Jose sa bayan ng Mapanas.
Sa tabing ng kontra-insurhensya, tinatrato ng mga sundalo na bilanggo ang masang magsasaka sa sariling nilang komunidad. Labis na salanta sa kabuhayan ng mga tao ang presensya at pang-aabusong ginagawa ng mga sundalo. Pinagbabawalan ng militar ang mga tao na umalis sa kanilang mga tahanan nang hindi muna humihingi ng pahintulot sa mga sundalo at pumirma sa isang logbook. Limitadong oras lamang silang pinahihintulutang magtrabaho sa kanilang lupa. Pinagbabawalan silang magdala ng bigas sa kanilang mga bukid o kaingin, sa takot na ibigay ito ng mga tao sa BHB. Kahit ang maliliit na tindahan ay inaatasang itala ang lahat ng bumibili sa kanila.
Nagwawasiwas ng mga baril ang mga sundalong sumasakop sa mga istrukturang sibilyan sa barangay. Sangkot at promotor sila ng mga gawaing anti-sosyal tulad ng pagsusugal, paglalasing, at pagbebenta at paggamit ng shabu. Nagpapaputok sila ng baril sa kalagitnaan ng gabi upang sindakin sa takot ang mga tao.
Gumagamit ang AFP ng panunupil ng estado at mga taktika ng terorismo upang pigilan ang mga tao na sumuporta sa Bagong Hukbong Bayan. Nilalantad nila mismo na huwad ang kanilang mga pahayag na hindi na tumatamasa ang BHB ng malawak na suporta ng mamamayan. Gayunpaman, nagtatagumpay lamang sila sa pagpukaw sa rebolusyonaryong galit ng mamamayan at pag-udyok sa kanila na lalo pang pahigpitin ang ugnayan sa hukbong bayan.