May mga pagkain na hindi kailangang maging mamahalin o komplikado upang magbigay ng ginhawa. Sa panahon ngayon na maraming pamilya ang naghahanap ng mga paraang makatipid nang hindi isinasakripisyo ang masustansiyang pagkain, mahalagang balikan ang mga simpleng putahe na matagal nang bahagi ng ating hapag. Isa na rito ang Sabaw na Mais na may Dahon ng Sili.
Ang mais ay isa sa mga pangunahing pananim sa maraming bahagi ng Pilipinas. Mula sa mga kabukiran ng Hilagang Luzon hanggang sa mga taniman sa Visayas at Mindanao, ito’y nagsisilbing mahalagang pinagkukunan ng pagkain at kabuhayan.
Samantala, ang dahon ng sili ay isang sangkap na madalas na nakakaligtaan o naiiwang nakasabit lang sa halaman sa bakuran. Ngunit sa ating mga probinsiya, matagal na itong ginagamit sa iba’t ibang sabaw at gulay dahil sa taglay nitong banayad na lasa at sustansiya.
Ang kagandahan ng sabaw na ito ay nasa pagiging payak. Hindi ito nangangailangan ng karne o mamahaling sangkap. Mais, dahon ng sili, bawang, sibuyas, tubig at kaunting asin o patis ay sapat na upang makagawa ng isang mainit at nakabubusog na putahe. Ito ang uri ng pagkain na nagpapaalala sa atin na hindi nasusukat sa dami ng sangkap ang sarap ng isang lutuing Pilipino.
Bukod sa pagiging matipid, ang mais ay nagbibigay ng enerhiya at fiber na mahalaga para sa ating katawan. Ang dahon ng sili naman ay mayaman sa iba’t ibang sustansiya at matagal nang bahagi ng tradisyonal na pagluluto sa maraming komunidad. Kapag pinagsama sa isang simpleng sabaw, nagiging pagkain itong hindi lang nakakabusog kundi nakapagpapagaan din ng pakiramdam.
Sa mga araw na maulan, kapag may sipon ang isa sa pamilya o kapag gusto lang natin ng tahimik na hapunan matapos ang mahabang araw ng trabaho, ang Sabaw na Mais na may Dahon ng Sili ay isang magandang ihain. Mainam itong ipares sa bagong saing na kanin at pritong isda. Maaari ring lagyan ng kaunting luya kung nais ng mas mabangong sabaw.
Sabaw na mais
Sangkap (para sa 4 hanggang 6 na tao)
- 2 tasa mais (sariwa o kinaltas)
- 1 bungkos dahon ng sili
- 1 sibuyas, hiniwa
- 3 butil bawang, dinikdik
- 6 tasa tubig
- Patis o asin ayon sa panlasa
Paraan ng Pagluluto
- Igisa ang bawang at sibuyas hanggang bumango.
- Ibuhos ang tubig at pakuluan.
- Idagdag ang mais at hayaang maluto at lumambot nang humigit-kumulang 10 minuto.
- Timplahan ng asin o patis ayon sa panlasa.
- Huling ilagay ang dahon ng sili at hayaang malanta sa mainit na sabaw.
Sa bawat mangkok ng sabaw na ito, makikita natin ang kagandahan ng lutuing Pilipino, simple, praktikal, masustansiya at nakaugat sa mga sangkap na madaling matagpuan sa ating bakuran, palengke at bukirin.
Minsan, hindi natin kailangang maghanap ng kakaibang pagkain upang makaranas ng tunay na ginhawa. Minsan, mais at dahon ng sili lang, solve na!